23 iyun 1920-ci il tarixində, "Sovet və ictimai təşkilatların qulluqçularının həmkarlar ittifaqı"nın, "Ticarət-sənaye qulluqçularının həmkarlar ittifaqı"nın və "Kooperativ qulluqçularının həmkarlar ittifaqı"nın birgə konfransında bu təşkilatların birləşdirilməsi barədə qərar qəbul edildi. Bunun nəticəsində tərkibində 6 min nəfərədək həmkarlar ittifaqı üzvü olan, "Sovet, ictimai və ticarət-sənaye müəssisələri işçilərinin həmkarlar ittifaqı" yaradıldı.

27-29 oktyabr 1920-ci ildə Bakı şəhərində Sovet, ictimai və ticarət-sənaye müəssisələri işçilərinin I qurultayı keçirildi. Qurultayda Respublikanın bütün qəzalardan nümayəndələri təmsil olunmuşdur.

Sovet hakimiyyəti illərində təşkilatımız respublikanın digər sahə həmkarlar ittifaqı təşkilatları ilə birlikdə Azərbaycanın sosial-iqtisadi, ictimai-siyasi inkişafında fəal iştirak etmiş, işçilərin və onların ailə üzvlərinin yaşam şəraitinin yaxşılaşdırılması, istirahətinin təşkilini öz üzərinə götürmüş, müəyyən sosial və hüquqi müdafiə funksiyalarını yerinə yetirmişdir. Mürəkkəb əmək problemləri üzə çıxdıqda, o cümlədən işçilər işdən qanunsuz çıxarıldıqda Respublika Komitəsi, bir qayda olaraq, həmkarlar ittifaqı üzvlərinə pulsuz məsləhətlər verir, məhkəmələrdə onların təmsilçisi kimi çıxış edirdi.

Öz inkişaf dövrü ərzində həmkarlar ittifaqı dinamik, çevik və səmərəli təşkilati struktura çevrilmiş, ölkə həmkarlar ittifaqı hərəkatının ayrılmaz hissəsi olaraq, Azərbaycan həmkarlar ittifaqlarının birliyinin, həmrəyliyinin möhkəmləndirilməsinə öz töhfələrini vermiş, vətəndaş cəmiyyətinin formalaşdırılmasına əvəzsiz xidmətlər göstərmişdir.